– غاد من شمس المغيب، على اطراف البحر الاكبر, مملكه.
اسوارهه مرتفعه جن غيمه خفيفه، ما يمر بترابهه قادم غريب
مملكه ابلايه نهار !!
الليل بخيوله يجول، يسحك الحلم اليجي بروجة بحر
مملكه تحكمهه عاهر عالمزاج، تسكر وتكتب قوانين البلاد
الحاشيه ابأخر الليل تاخذ احلام الشعب وتمر على ابواب المزابل
مملكه قصر الظلم بيها يعاني أمن الضجيج
الجواري تعاني من ازمة شباب، السكر … حد الخراب .
– على باب المملكه مرسوم خنجر !!
ابداية كل شوارعهه المظلمه تحرس السكان حيه
الخوف وحده ابلا صديق ايطوف برجاء المكان
مملكه، دستورها ما يعترف باسم الفضيله
كل بنوده انكتبت ابخط الرذيله ..
– مملكه ابلايه سجون !!
الحاشيه لمن تمر بالناس تسبكهه المشانق
الحناجر من تثور، تعزف اعله اوتارهه بليل الخناجر
الرماد يسافر لكل عين تحلم، العيون تخاف تحلم
الايادي ملطخه بدم البراءه، الجريمه انخطت بكل الدفاتر
الشعب ما عنده كلمه غير .. حاضر
العلم دم، والنشيد الملكي (تحيا الظليمه
الموت ذكرى عالقه بذهن المقابر
– مملكه، اتحب المجون !!
خاليه من الحنان والوفه والمستحه
الهوى العذري جريمه ينتهي بالمشرحه
الصدق ما عنده بيت، استوطن ارحام العواقر مملكه .. ما بيها باكر
البكاره اعتداء على قانون المماليك الرخيصه
الشرف قصه قديمه، الاساطير القديمه ما تثور
– بمثل هالجو الملوث .. بالخطا .. انولدت اميره
الطير الابيض على الشاطي غطه راسه حدر جنحه
– احتفاءا بالاميره …
الريح صارت عالقصر نسمه تمر
الريح لو بيًن تعبهه اتصير نسمه
البحر مد روحه اعله طوله نسه غدره بالسفن
البحر لحظة حنانه يحضن اصدور السفن
الانين ال بالمقابر صار غنوه، تهتف باسم الاميره
الروح لو عرفت وجعهه طبعا ايهون الالم
اعتزازا بالاميره الطير الابيض هوى الشاطي
– الاميره، اعتادت اطباع القصور
اتعلمت ضرب الطبول
اتنصلت عن البراءه وداست اعناق الزهور
الاميره، مثل حزن الطير الابيض
ويه روج البحر يكبر
وي سكون الليل يكبر
صارت اتمر على الشاطي وينتفض شوك البحر
جسد ابيض كل غطاه خيطين والباقي ضوه
المواسم كلها مرت والطيور العاشگه اتحب الغوه
الاميره، ام ظفيره، اكتبت فوگ الشاطي –تعسا للطيور –
غادرت كل الطيور
اغتاض روج البحر الاكبر، وانكسر وجه الضوه
الطير الابيض شرب حزنه وارتوه !!!
