شلت عشرتك دمعه بعيني هل ايام
وين الله من اشوفك بلكت ابجيه
تتنادس جروحي من يحل ملكاك
تبلس من تشوفك خلك راعيه
ما تفرق ضحكتي وضحكت الجناز
انه وياك حته الضحكه ناسيه
تتحزم اعيوني بدمع لو مريت
عل فطره وحكك ما موصيه
فوك متوني ياخذ راحته التابوت
صبخه وثكل حملك ما يمض بيه
عتبت بيتك اتمنيت عده السان
حته دكلك اشكد نايم اعليه
ما حركت رمشك من مريت
وانه اشبك طعنتك من الاكيه
الجكاير كحلت شفتي اعله حس طرواك
مرات اشتبه وعيوني اسميه
هاي اسنيني بيدك موش طاست ماي
كل ما اديرلك ضهري تبديه
عفتتني بنار ياهو الكلك براهيم
والكثر بلكواغد كمت تطفيه
انه تمنيت تخطر مكبره اعله البال
حته ادفن ذكرتك ما الخليه
عشرتي وياك عشرت سده ويه الماي
اجي بلهفتي وتدفعني ورد ليه
لذب لومك اعله القسمه ولايام
انته الما ردتني القسمه شعليه
لتغرك شمس تضحك لهذا وذاك
الغيمه اشما تغنتب تصحه تاليه
الما عنده سكف ليعاند ويه الغيم
يستبرد مجرد يمر طاريه
شكبر صيت البحر كضه العمر مطروح
وتسحكه الطيور بطرف رجليه
احساسك مور كتلك ما يمر بي شوك
مثل صحره تشل اجفوف ساكيه
طعناتك بضهري تمرجحن بلعيد
وكولن عيد زحمه اشلون ابجيه
بس اليا وكت ابقه الهواك شراع
نسماتك تعيل وما احاجيه
ابتديت من النهايه وياك بس ما فاد
اهل مكه تره ادره باهاليهه
غرفة صاحبك تشبه حضن سرداب
الله يساعدك وشولن كاضيه
